Таймеры на святлафорах у Мінску адключаць не будуць — ДАІ

Таймеры на мінскіх святлафорах адключаць не плануецца. Пра гэта гаворыцца ў паведаленні сталічнай ДАІ.

Раней стала вядома, што з ініцыятывы мясцовай ДАІ адключылі ўсе таймеры на святлафорах у Магілёве. Магілёўскія даішнікі патлумачылі гэта тым, што тамеры перашкаджаюць і пешаходам, і кіроўцам. Справа ў тым, што бачачы, як секунды сканчаюцца, удзельнікі дарожнага руху паскараюцца, каб праскочыць на дазволенае святло. Гэта павялічвае верагоднасць аварыйнай сітуацыі. 

Пасля гэтага шэраг інтэрнэт-рэсурсаў паведаміў, што ДАІ вырашыла адключыць таймеры зваротнага адліку на святлафорах, але без геаграфічнай прывязкі.

"Сталічная дзяржаўтаінспекцыя інфармуе: у Мінску адключэнні святлафорных таймераў зваротнага адліку не плануюцца і рэалізоўвацца не будуць", — гаворыцца ў паведамленні ДАІ.