"Перагарнуць старонку" ў разуменні Лукашэнкі не азначае адлігу: меркаванні экспертаў

Палітычны аглядальнік Аляксандр Фрыдман лічыць, што заклік Аляксандра Лукашэнкі "перагарнуць старонку" азначае патрабаванне прызнаць яго пераможцам, а не гатоўнасць да лібералізацыі. Пра гэта ён сказаў у каментары для праграмы Еўрарадыё "Сэнсы дня" адносна выступлення Лукашэнкі на міжнароднай канферэнцыі па еўразійскай бяспецы.

Паводле слоў Фрыдмана, Лукашэнка лічыць пратэсты 2020 года знешняй спробай адхіліць яго ад улады, а Еўропа і ЗША павінны прызнаць адказнасць за пратэсты і ўласнае паражэнне.

Фрыдман звярнуў увагу, што Лукашэнка даўно не выступаў перад такой замежнай аўдыторыяй і адыходзіў ад падрыхтаванага тэксту. Такім чынам ён хацеў паказаць веданне міжнароднай абстаноўкі.

Палітычны аглядальнік назваў Лукашэнку "палітычным маргіналам" у сусветным маштабе і заявіў, што нічога новага для еўрапейцаў у яго прамове не прагучала.

У сказаным заходнія палітыкі пачулі толькі дзве пазіцыі: Мінск не намерваецца ахоўваць мяжу і змагацца з нерэгулярнымі мігрантамі, а таксама не зацікаўлены ва ўцягванні Беларусі ў вайну ва Украіне.

"Перагарнуць старонку ў сістэме каардынат Лукашэнкі ні ў якім разе не азначае адлігу", — сказаў Фрыдман.

Ён лічыць, што Лукашэнка хоча выбудоўваць адносіны з Захадам па сваіх правілах, без умяшання ва ўнутраныя справы, уключаючы пытанні правоў чалавека і палітвязняў, і што чакаць адлігі не варта.

Дракахруст: Лукашэнка хваліць Трампа, каб захаваць адносіны і атрымаць бонусы

На канферэнцыі Аляксандр Лукашэнка расхвальваў прэзідэнта ЗША Дональда Трампа. Аналітык Цэнтра новых ідэй Юрый Дракахруст лічыць, што гэта робіцца дзеля эканамічных і, магчыма, абарончых бонусаў. Лукашэнка таксама хоча прысутнічаць за перамоўнымі сталамі, сказаў аналітык у каментары для Еўрарадыё.

Паводле слоў Дракахруста, Лукашэнка лічыць найбольш выгадным для сябе падыход да міру ва Украіне, які прапануе Трамп, а не Уладзімір Пуцін. Аналітык адзначыў, што ў Пуціна ёсць канкрэтныя пажаданні па выніках міру, а Трампу "па вялікім рахунку ўсё роўна, абы быў мір". Ён дадаў, што Лукашэнка прапануе Еўропе пайсці шляхам Трампа, які вядзе палітыку дыялогу з Мінскам са студзеня мінулага года.

Пры гэтым Лукашэнка не абяцае нічога канкрэтнага. "Закрыццё старонкі ў цяперашняй канкрэтнай сітуацыі" можа азначаць права працягваць рэпрэсіі, а можа азначаць вызваленне і амністыю пацярпелых.

На думку Дракахруста, заявы Лукашэнкі могуць быць адрасаваны ў тым ліку і беларускаму грамадству і ўпісаны ў шэраг непублічных крокаў, такіх як наладжванне адносін з Польшчай і іншыя спробы гаварыць з Захадам.