Шэсць краін заявілі аб адмове гуляць супраць Расіі на чэмпіянаце свету па хакеі

Нацыянальныя хакейныя федэрацыі Фінляндыі, Нарвегіі, Даніі і Швецыі паведамілі, што іх зборныя не будуць гуляць супраць Расіі на чэмпіянаце свету 2027 года. Латвія і Чэхія таксама пацвердзілі, што не правядуць матчаў з расійскай камандай.

Рашэнне паўночных федэрацый стала адказам на пастанову Спартыўнага арбітражнага суда (CAS), які абавязаў Міжнародную федэрацыю хакею (IIHF) забяспечыць Расіі ўдзел у турніры. Чэмпіянат пройдзе ў маі 2027 года ў Германіі. Расія не ўдзельнічае ў турнірах IIHF з 2022 года.

Старшыня Фінскай хакейнай асацыяцыі Хейкі Хіетанен пацвердзіў рашэнне ў інтэрв'ю MTV Urheilu. Па яго словах, асацыяцыя далучылася да кааліцыі краін, якія хочуць паўплываць на IIHF.

"Мы імкнёмся сфарміраваць адзіны фронт, таму што разам мы мацнейшыя", — сказаў ён.

На пытанне аб магчымым байкатаванні чэмпіянату Хіетанен адказаў, што ніводзін з варыянтаў не выключаны, але федэрацыя хоча "байкатаваць Расію", а не турнір.

Нарвежская федэрацыя паведаміла IIHF, што зборная не выйдзе на матч з Расіяй, астатнія гульні турніру яна праводзіць па раскладзе. У федэрацыі назвалі прычынамі абарону спартсменаў і магчымую пагрозу бяспецы каманды, паведамляе Reuters. 

Дацкі хакейны саюз таксама паведаміў IIHF аб сваім рашэнні. Шведская федэрацыя паведаміла, што рашэнне прынята пасля абмеркаванняў з краінамі Паўночнай Еўропы.

Латвійская хакейная федэрацыя заявіла, што яе пазіцыя з 2022 года не змянілася: зборныя краіны не гуляюць супраць каманд Расіі і Беларусі, пакуль працягваецца агрэсія ва Украіне.

Дзяржаўны савет па спорце Фінляндыі пастанавіў, што федэрацыі з дзяржаўным фінансаваннем і іх зборныя не павінны выступаць супраць Расіі.

Кампанія Nokian Renkaat паведаміла, што адмовіцца ад спонсарства чэмпіянату 2027 года, калі ў ім возьме ўдзел Расія. Раней пра адмову ад спонсарства турніру заявіла шведская кампанія AJ Produkter, якая пачынаючы з 1989 года была партнёрам чэмпіянату. І чэшскі букмекер Tipsport.

Горад Турку заявіў, што адмовіцца прымаць маладзёжны чэмпіянат свету 2027–2028 гадоў пры ўдзеле расійскай каманды.