Экс-дырэктара "Камунаркі" асудзілі на сем гадоў калоніі
Сяргей Анюхоўскі / 1prof.by
Сем гадоў пазбаўлення волі прысудзіў Вярхоўны суд былому генеральнаму дырэктару кандытарскай фабрыкі "Камунарка" Сяргею Анюхоўскаму. Таксама ён павінен заплаціць штраф у 45 тысяч рублёў (1000 базавых велічыняў) і не можа займаць пэўныя пасады цягам пяці гадоў, паведамляе Генпракуратура.
Анюхоўскага прызналі вінаватым у перавышэнні ўлады ці службовых паўнамоцтваў і атрыманні хабару ў буйным памеры.
Сцвярджаецца, што Анюхоўскі ў 2022-2024 гадах загадваў падначаленым фальшаваць звесткі пра неэфектыўны праект па перапрацоўцы какава-бабоў. Таксама ён падаваў заведама падложныя дакументы ў дзяржорганы, каб атрымаць сродкі з інавацыйнага фонду Мінгарвыканкама. Ад прадстаўнікоў пастаўшчыка абсталявання для перапрацоўкі какава-бабоў ён атрымаў хабар для сябе і жонкі.
Анюхоўскі кіраваў "Камунаркай" з 2021 года. У чэрвені 2025-га гендырэктарам фабрыкі быў прызначаны Аляксандр Нячай.
У 2019‑2024 гадах Анюхоўскі быў членам Савета Рэспублікі. Таксама ён быў дэлегатам Усебеларускага народнага сходу.
