Цяжарных беларусак хочуць вызваляць ад працы для паходаў да лекара
Цяжарная жанчына, ілюстрацыйнае фота / pixabay.com
Цяжарныя жанчыны ў Беларусі змогуць на законных падставах пакідаць працу для здачы абавязковых аналізаў і наведвання дактароў. Адпаведныя змены плануецца ўнесці ў працоўнае заканадаўства. Пра гэта ў тэлеэфіры паведаміла член Палаты прадстаўнікоў Анжаліка Курчак.
Паводле яе, прапанова была прадыктаваная рэальнымі зваротамі грамадзян. Яна расказала, што падчас сустрэчы з выбарцамі да яе прыйшоў мужчына. Ён скардзіўся на начальства сваёй цяжарнай жонкі, якое адмаўляецца адпускаць яе ў паліклініку ў працоўны час.
Дэпутатка падкрэсліла, што цяпер у Працоўным кодэксе няма нормы, якая рэгулюе вызваленне ад працы для праходжання планавых медыцынскіх абследаванняў.
"Пытанне я прапрацавала з Міністэрствам аховы здароўя. Спадзяюся, што калі да нас прыйдзе гэты законапраект, я буду ініцыяваць ўнясенне такога дапаўнення ў наш Працоўны кодэкс", — заявіла Курчак.
