Усе толькі і кажуць пра напад Расіі на краіну НАТА. А як гэта можа выглядаць?

Краіны Еўропы чакаюць у бліжэйшы час правакацый у рэгіёне. Прэм'ер-міністр Польшчы Дональд Туск заявіў, што "Расія рыхтуецца да эскалацыі напружанасці як у вайне з Украінай, так і ва ўсім рэгіёне". Верагодна, што гэтую тэму ўздымаў у Маскве дырэктар ЦРУ Джон Рэткліф на сустрэчы з высокапастаўленымі сілавікамі Расіі. Агрэсіі з боку Расіі могуць падвергнуцца краіны Балтыі, у прыватнасці Латвія.

У эфіры Еўрарадыё ўкраінскі аналітык Ігар Тышкевіч выключыў верагоднасць паўнавартаснага нападу, але не выключыў "разыгрывання карты так званых неграмадзян Латвіі альбо рускамоўнай меншасці" з боку Расіі.

Ён нагадаў, што "Пуцін больш любіць менавіта такія гібрыдныя канфлікты".

— Давайце ўспомнім: вайна супраць Грузіі — гэта была "аперацыя па прымусу да міру", а вайна супраць Украіны ў 2014 годзе — "нас там няма". З 2022 года — "спецыяльная ваенная аперацыя", — кажа Тышкевіч.

Як можа выглядаць такі сцэнар? Адстаўны польскі ваенны лётчык, удзельнік міратворчых місій ААН UNPROFOR і UNIKOM, ваенны аналітык Міхал Фішэр апісаў магчымае развіццё падзей.

"Яны могуць выкарыстоўваць дроны розных тыпаў для атак на важныя аб'екты. Уявіце сабе такі сцэнар. У краіне беспарадкі, напрыклад, у Латвіі. Мясцовае прарасійскае насельніцтва пачынае бунтаваць і патрабаваць сваіх правоў, таму што ў цяперашні час яны з'яўляюцца "неграмадзянамі". Яны не могуць набываць нерухомасць, не могуць адкрыць фірму, а пра выбарчыя правы нават казаць няма чаго. І раптам гэтае насельніцтва падымае галаву. Пачынаюцца беспарадкі, бойкі, дэманстрацыі і жорсткая рэакцыя латвійскай паліцыі. Канфлікт разгарэўся вельмі моцна, выклікаючы значную цікавасць усёй Еўропы. Што там, чорт вазьмі, адбываецца? У чым справа? Чаму адны латышы бунтуюць супраць іншых латышоў?", — апісвае пачатак канфлікту Фішэр.

Затым пачынаюць прылятаць дроны, працягвае эксперт.

"Адзін, класічны FPV, знішчыў паліцэйскую машыну. Іншы дрон забіў латвійскіх паліцэйскіх. Чарговы, некалькі большы дрон-бамбавік скінуў баявы зарад на аўтамабільны парк у казармах, выклікаўшы пажар сабраных там транспартных сродкаў.

Інцыдэнты выклікаюць магутны шок. Пра гэта пішуць і гавораць у навінах па ўсёй Еўропе. Сілы НАТА прыведзеныя ў стан найвышэйшай гатоўнасці. Але хто пасылае гэтыя дроны? Расія?", — пачнуць задавацца пытаннем еўрапейцы.

Спецыяльныя міжнародныя групы даследуюць знойдзеныя абломкі, але аказваецца, што гэта дроны, сабраныя з кітайскіх, агульнадаступных камплектуючых, якія купляюцца на AliExpress, працягвае развіваць сцэнар Міхал Фішэр.

"Выбухоўка самаробная. Так, прафесійна падрыхтаваная, але зробленая з агульнадаступных кампанентаў, таксама і ў Латвіі. І што з гэтага вынікае?

Няма слядоў расійскай дзейнасці, акрамя радыёперадачы з іх боку мяжы, але ці звязана гэтая перадача напэўна з дронамі? Яна рэгіструецца штодня, у тыя дні, калі дроны не лётаюць, — таксама. Якія ж у нас ёсць доказы таго, што гэтыя дроны паходзяць з Расіі?", — пытаецца эксперт.

А тым часам спіраль канфлікту разгараецца.

"Раз'юшаныя латышы, якія страцілі блізкіх у гэтых таямнічых атаках, бяруць рэванш у рускай меншасці. У адказ колькасць інцыдэнтаў з дронамі множыцца, краіна пагружаецца ва ўсё большы хаос, пачынаюць таксама прылятаць больш буйныя апараты, улятаюць з боку Расіі і Беларусі, але аказваецца, што немагчыма адназначна ўстанавіць іх паходжанне — расійскія яны ці, магчыма, украінскія.

Яны ўтрымліваюць часткі, якія выкарыстоўваюцца ў расійскіх дронах, але таксама часткі, тыповыя для ўкраінскіх. А канструкцыя нейкая невядомая, нібыта новы планер, рухавік у выглядзе поршневага рухавіка кітайскай вытворчасці, таксама даступнага на гандлёвых платформах. Схема навігацыйнай сістэмы тыповая для дронаў, якія выкарыстоўваюцца як Расіяй, так і Украінай", — прадказвае сітуацыю Фішэр.

Дроны наносяць велізарную шкоду, знішчаюць энергетыку, запасы паліва, паралізуюць чыгуначныя вакзалы. Малыя FPV-дроны ўсё часцей і смялей атакуюць вайскоўцаў, паліцыю, службы. У краіне, па сутнасці, ідзе вайна, але ніхто не ведае, з кім, працягвае развіваць сцэнар Міхал.

"Вядома, усе вераць, што за гэтым відавочна стаіць Расія. Але якія цвёрдыя доказы гэтага? Уласна, ніякіх няма, ёсць розныя ўскосныя ўлікі, вельмі моцныя, чорт ведае якія, але ўсё яшчэ толькі ўскосныя ўлікі. Міністры абароны краін НАТА ажыўлена абмяркоўваюць: што рабіць? Мы ўпэўненыя, што Масква наогул замяшаная ў гэтым? А ўпэўненыя мы, што гэтую вайну сапраўды вядзе Расія? І ці з'яўляецца гэта ўзброенай агрэсіяй замежнай дзяржавы або ўмяшаннем у фактычна грамадзянскую вайну?