У Петрыкаўскім раёне ўвялі каранцін праз успышку АЧС на прыватным падворку
Афрыканская чума свіней адносіцца да асабліва небяспечных захворванняў жывёл / kormix.pro
У Петрыкаўскім раёне Гомельскай вобласці ўведзены каранцін у сувязі са ўспышкай афрыканскай чумы свінняў. Ачаг захворвання выяўлены на прыватным падворку ў вёсцы Турок.
Рашэнне аб устанаўленні каранціну прыняў Петрыкаўскі раённы выканаўчы камітэт. Дакументы ў распараджэнні рэдакцыі прадаставіла ініцыятыва BELPOL. Эпізаатычным ачагом вызначана тэрыторыя асабістай падсобнай гаспадаркі ўладальніка, пагрозлівай зонай радыусам 3 кіламетры — вёскі Ільіч і Вышалаў Петрыкаўскага раёна, зонай назірання — тэрыторыя ўсяго раёна.
Аб гэтым паведамляецца ў даведцы-абгрунтаванні да рашэння райвыканкама, падрыхтаванай галоўным ветэрынарным урачом раёна Міхаілам Мазуркевічам.
На перыяд каранціну ў ачагу захворвання забаронены ўваход і ўезд старонніх асоб і транспарту, вываз жывых свінняў і прадуктаў забою, вываз свінагадоўчай сыравіны і кармоў, перагрупоўка жывёл, а таксама нарыхтоўка і рэалізацыя свініны і іншай жывёлагадоўчай прадукцыі.
