У Гомелі мужчына нападаў з нажом на людзей — СМІ

Да вайсковага патруля, які дзяжурыў у Савецкім раёне Гомеля, звярнуўся мужчына з рэзанымі ранамі. Ён сказаў, што ў суседнім доме малазнаёмы чалавек збіў і парэзаў яго і яшчэ аднаго чалавека, перадаюць "Моцныя Навіны".

Байцы пайшлі да паказанага шматпавярховіка і заўважылі яшчэ аднаго пацярпелага, яму выклікалі хуткую. Неўзабаве з пад'езда выйшаў мужчына. Пацярпелы сказаў, што гэта і быў нападнік.

Калі вайскоўцы падышлі да яго, мужчына сказаў, нібыта абараняўся нажом, а потым выкінуў зброю з акна сваёй кватэры на 12-м паверсе. Патрульныя не паверылі ў гэтую версію і затрымалі мужчыну.

Потым вайскоўцы знайшлі нож і ачапілі ўчастак да прыезду следчых. Затрыманага перадалі ў міліцыю.