Сяргею Міхалку завочна прысудзілі чатыры гады калоніі

Мінскі гарадскі суд агучыў завочны прысуд музыканту Сяргею Міхалку.

Лідару гуртоў "Ляпіс Трубяцкі", Brutto ды іншых праектаў прысудзілі чатыры гады папраўчай калоніі агульнага рэжыму. Яго прызналі вінаватым у распальванні варожасці і абразе Лукашэнкі.

Падставай для крымінальнай справы на Міхалка сталі публікацыі ў сацсетках яго праекта Brutto, зробленыя ў 2021-22 гадах. Маўляў, там ён апублікаваў "відэазапісы, якія змяшчаюць негатыўную ацэнку прэзідэнта Рэспублікі Беларусь, выяўленую ў непрыстойнай, у тым ліку ненарматыўнай форме маўленчага выказвання".

Таксама, як заявілі ў пракуратуры, у сакавіку 2022 года Міхалок апублікаваў у сваіх сацсетках "відэазапіс, у якім утрымліваецца негатыўная ацэнка груп асоб, аб'яднаных па прыкмеце прафесійнай прыналежнасці: супрацоўнікі праваахоўных органаў і вайскоўцы, якая па сваім змесце накіравана на ўзбуджэнне і распальванне іншай сацыяльнай варожасці і варожасці па прыкмеце сацыяльнай прыналежнасці ў дачыненні да сацыяльнай групы, аб'яднанай па прыкмеце, сацыяльнай прыналежнасці".

Хутчэй за ўсё, гаворка ідзе пра антываенныя ролікі, запісаныя Міхалком у першыя тыдні расійскага ўварвання ва Украіну ў 2022 годзе.