Швейцарыя не будзе байкатаваць хакейны чэмпіянат свету пры допуску Расіі

Швейцарыя не далучыцца да байкоту чэмпіянату свету па хакеі, калі на турнір дапусцяць зборную Расіі. Пра гэта заявіў кіраўнік Швейцарскай федэрацыі хакея.

Паводле яго слоў, арганізацыя асуджае ваенную агрэсію Расіі, але лічыць, што цяпер гаворка ідзе пра спартыўныя, а не палітычныя пытанні. Рашэнне застаецца за Міжнароднай федэрацыяй хакея на лёдзе (IIHF). Менавіта яна павінна вызначыць, ці змогуць расіяне ўдзельнічаць у турнірах і на якіх умовах.

Швейцарская федэрацыя заклікала не спяшацца з высновамі, спакойна ацаніць розныя пазіцыі і пазбягаць эмацыйных рашэнняў.

Нагадаем, Спартыўны арбітражны суд (CAS) 30 кастрычніка дапусціў зборныя Расіі да пяці міжнародных чэмпіянатаў сезона 2026/2027. 

Суд паказаў, што IIHF не прадставіла дастатковых доказаў для абгрунтавання недапуску расійскіх каманд. 

Рашэнне выклікала пратэст шэрагу краін: Фінляндыя, Швецыя, Нарвегія, Данія, Латвія і Чэхія заявілі, што не будуць гуляць супраць Расіі. 

Некаторыя даўнія спонсары чэмпіянату свету таксама паведамілі, што могуць спыніць супрацоўніцтва.