НАТА стварае сетку беспілотнікаў са ШІ ўздоўж межаў з Расіяй і Беларуссю

НАТА плануе ўзмацніць усходні фланг сеткай з тысяч беспілотнікаў, датчыкаў і спадарожнікаў, аб'яднаных штучным інтэлектам (ШІ). Пра гэта паведамляе выданне Politico.

Альянс вывучае выкарыстанне беспілотнікаў з падтрымкай ШІ ў рамках Eastern Flank Deterrence Initiative (EFDI) — ініцыятывы па стрымліванні на ўсходнім флангу. Сетка будзе адсочваць пагрозы ўздоўж межаў НАТА з Расіяй і Беларуссю — ад паўночнай Фінляндыі да Чорнага мора. 

Сістэма павінна выяўляць парушэнні межаў краін альянсу і служыць першым эшалонам абароны, аб'ядноўваючы даныя з розных крыніц. 

Так, пры выяўленні беспілотнікам патэнцыяльнага праціўніка штучны інтэлект зможа супаставіць гэтую інфармацыю са спадарожнікавымі здымкамі, данымі сэнсараў і радараў і перадаць яе саюзнікам па НАТА, пасля чаго камандзіры змогуць выбраць сілы для адказу.

У альянсе гэтую канцэпцыю называюць kill web ("сетка паражэння"). Яна прадугледжвае перадачу даных наўпрост аператарам замест працяглай перадачы інфармацыі ад лініі фронту да камандавання і назад. 

"Раней інфармацыя ішла праз мноства пасрэднікаў. Сёння яна можа паступаць адразу ад датчыка да інструмента ўздзеяння", — сказаў капітан арміі ЗША Ронан Сефтан.

У НАТА разлічваюць, што сістэма дазволіць альянсу хутчэй за праціўніка адаптавацца да змен на полі бою, і плануюць рэалізаваць праект у кароткія тэрміны.