І буйному бізнесу гэтая ідэя таксама не падабаецца. Калі ўвесці пошліны супраць гандлёвых партнёраў ЗША і саюзнікаў, то незразумела, якімі будуць наступствы. Адным словам, ва ўсіх ёсць тысяча і адна прычына, каб працягваць купляць расійскую нафту і спансіраваць яе вайну ва Украіне.
Дзеля аднаго сэлфі
Прэзідэнт ЗША Дональд Трамп любіць падарункі. Вось эмір Катара падарыў яму самалёт, і Трампу гэты падарунак так спадабаўся, што ён вырашыў не звяртаць увагі на ўсе парады і паляцець на ім у рабочую паездку ў Ірландыю.
Праблема ў тым, што гэты апарат першапачаткова распрацоўваўся як раскошны транспарт для каралеўскай сям’і Катара, а не як добра абаронены самалёт для прэзідэнта ЗША. Самалёт мадэрнізавалі за сотні мільёнаў долараў, але некаторыя эксперты ў пытаннях бяспекі ўсё яшчэ сумняваюцца ў тым, што прэзідэнту бяспечна знаходзіцца на яго борце. Незразумела, ці ўсталявана на ім перадавая сістэма супрацьракетнай абароны, як на ранейшых прэзідэнцкіх самалётах.
Ананімны чыноўнік Белага дома паведаміў выданню Washington Post, што Трамп плануе ляцець менавіта на гэтым самалёце, хоць мадэрнізацыя лайнера яшчэ не завершана.
Нядаўна Трампу давялося пайсці на фокус са знікненнем, каб толькі не ляцець на гэтым жа самалёце назад з Турцыі. Пасля таго як ён падняўся па трапе і памахаў рукой фатографам, яго таемна вывезлі праз бакавыя дзверы ў машыне для загрузкі харчавання на борт і перавезлі да невялікага самалёта ВПС. Пра гэта вы маглі чытаць у іншым выпуску "Амерыканскага весніка".
На якія яшчэ трукі давядзецца пайсці спецыялістам па бяспецы Трампа, каб ён мог сфатаграфавацца на трапе любімага самалёта? Раскажам, калі даведаемся.
Грошы Ілана Маска зноў у справе
Самы багаты чалавек у свеце зноў гатовы даваць грошы на палітыку. Ён плануе падтрымаць на выбарах Рэспубліканскую партыю і гатовы выдаткаваць на гэта больш за 100 млн долараў, піша New York Times. Першыя 800 тысяч долараў ужо патрацілі.
А яшчэ ў адносінах Маска і Рэспубліканскай партыі не ўсё было гладка: ён нават пагражаў стварыць сваю партыю — лепшую.
І ўсё ж Маск плануе падтрымаць правых, як і ў 2024 годзе, калі да ўлады ў ЗША прыйшоў Дональд Трамп. Тады дзякуючы грашам Маска ўдалося мабілізаваць 5,5 тысячы агітатараў, якія абышлі дамы выбарцаў, чыя верагоднасць удзелу ў выбарах была нізкай. Трамп рэгулярна хваліў намаганні Маска.
Арганізацыя Маска America PAC (Амерыканскі камітэт палітычных дзеянняў) ужо пачала размяшчаць рэкламу ў Facebook і Google. Напрыклад, ужо з’явілася рэклама, якая негатыўна паказвае мэра Нью-Ёрка Зорана Мамдані.
“Калі вы не прагаласуеце ў лістападзе, сацыялізм можа абвясціць пра сваю перамогу над Амерыкай”, — гаворыцца ў рэкламным слогане.
Ці дапамогуць грошы Маска рэспубліканцам на гэты раз? Даведаемся ў лістападзе, калі адбудуцца прамежкавыя выбары.
Ці дапамогуць грошы Маска, калі растуць кошты?
Амерыканскія кіроўцы яшчэ ніколі столькі не плацілі за дызельнае паліва. Упершыню кошты пабілі гістарычны рэкорд, калі Расія ўварвалася ва Украіну. А цяпер усталявалі новы рэкорд, і на гэты раз прычына — вайна з Іранам. Гэтае ўздзеянне вайны на кашалькі можа пахіснуць пазіцыі рэспубліканцаў на прамежкавых выбарах.
У ЗША дызельнае паліва ў асноўным выкарыстоўваецца для запраўкі камерцыйнага транспарту: грузавікоў, цягнікоў, аўтобусаў, сельскагаспадарчай і будаўнічай тэхнікі. З пачатку канфлікту з Іранам у канцы лютага кошты на паліва рэзка выраслі. Праз вайну фактычна перакрыты Армузскі праліў — вузкі водны шлях на поўдзень ад Ірана, праз які транспартуецца пятая частка сусветных паставак нафты.
