Экс-каліноўца Верамейчыка, выкрадзенага з В’етнама, перавялі ў турму

Палітвязню Васілю Верамейчыку змянілі рэжым зняволення: з калоніі яго перавялі ў турму. Пра гэта піша "Наша Ніва" са спасылкай на жонку былога каліноўца Яўгенію.

Паведамляецца, што 9 ліпеня Верамейчыка перавезлі са шклоўскай калоніі №17 у магілёўскую турму №4. На які перыяд яму змянілі рэжым утрымання — невядома.

У чэрвені стала вядома, што ў Верамейчыка ўзніклі сур’ёзныя праблемы са здароўем. Праваабаронцы дадалі яго ў гуманітарны спіс. Мяркуючы па леках, прапісаных палітвязню ў калоніі, ён мог перанесці інфаркт міякарда або меў вялікую рызыку развіцця такога інфаркту.

Паведамлялася, што на пачатку чэрвеня яго мусілі пакласці ў бальніцу пры мінскім СІЗА-1, каб зрабіць аперацыю на сэрцы. Аднак замест бальнічнага ложка палітвязень аказаўся ў ШІЗА, а потым — у ПКТ. Умовы там павялічваюць нагрузку на сэрца.