Трамп не пусціў CNN на борт Air Force One

Прэзідэнт ЗША Дональд Трамп забараніў журналістам CNN суправаджаць яго на борце Air Force One падчас паездкі ў Тэнэсі. Канал павінен быў працаваць у тэлевізійным пуле і асвятляць візіт прэзідэнта ў Ноксвіл, дзе Трамп збіраўся наведаць матч студэнцкага футбола. Белы дом без тлумачэння прычын адклікаў акрэдытацыю CNN.

CNN дзесяцігоддзямі ўдзельнічаў у ратацыі пяці найбуйнейшых амерыканскіх тэлеканалаў, якія атрымліваюць магчымасць суправаджаць прэзідэнта і асвятляць яго паездкі. Цяпер замест CNN Белы дом уключыў у пул кансерватыўны канал Real America’s Voice.

Гэта адбылося на фоне канфлікту адміністрацыі Трампа з CNN, Politico і MS NOW. Трамп абвінавачваў гэтыя СМІ ў публікацыі "фэйкавых навін" і раней загадаў пазбавіць іх пастаяннага доступу ў Белы дом. На мінулым тыдні супрацоўнікі Сакрэтнай службы не пусцілі журналістаў трох выданняў на тэрыторыю і забралі ў іх прэс-карты.

Федэральны суддзя ў Вашынгтоне пазней часова адмяніў забарону на доступ, аднак яго рашэнне тычылася менавіта Белага дома. Юрыст Элі Хоніг заявіў CNN, што адмова ў доступе да Air Force One можа парушаць "дух" гэтага рашэння. На яго думку, юрысты тэлеканала могуць зноў звярнуцца ў суд.