МЗС Чэхіі хоча спрасціць выдачу віз для сваякоў беларусаў, якія пражываюць у краіне
Чэхія, ілюстрацыйнае фота / pixabay.com
Міністэрства замежных спраў Чэхіі хоча змяніць візавыя меры для сваякоў беларусаў, якія пражываюць у Чэхіі. З адпаведнай прапановай ведамства звярнулася ва ўрад, паведамляе Прадстаўніцтва беларускіх дэмсілаў у Чэхіі.
"Прапанова пашырае магчымасць падачы заяў на кароткатэрміновыя візы з мэтай наведвання сям'і для бліжэйшых сваякоў грамадзян Чэхіі, а таксама беларусаў з доўгатэрміновым або пастаянным відам на жыхарства на тэрыторыі Чэхіі", — гаворыцца ў паведамленні.
У Прадстаўніцтве беларускіх дэмсілаў выказваюць надзею, што прапанова будзе ўхваленая і паспрыяе "захаванню ключавых чалавечых і сямейных сувязяў".
Раней гэтае пытанне абмяркоўвалася на сустрэчы Святланы Ціханоўскай з кіраўніком МЗС Чэхіі Пятром Мацынкам.
