Беларус Ілля Шкурын аформіў хет-трык у польскім чэмпіянаце

Беларускі нападаючы "Катавіцэ" Ілля Шкурын забіў тры мячы ў матчы дзевятага тура польскай Экстракласы супраць "Гурніка" з Забжа. Яго каманда здабыла перамогу з лікам 3:2.

Шкурын адкрыў лік на 11-й мінуце сустрэчы. У другім таймe "Гурнік", віцэ-чэмпіён Польшчы, выйшаў наперад, аднак беларускі форвард зраўняў лік на 91-й мінуце, а на 100-й мінуце забіў трэці мяч, які прынёс "Катавіцэ" перамогу.

Паводле даных статыстычнага партала Sofascore, за гэту гульню Шкурын атрымаў ацэнку 9,5 — адну з самых высокіх у бягучым сезоне Экстракласы.

Пасля гэтага матча на ліку Шкурына сем голаў і дзве выніковыя перадачы ў дзевяці гульнях сезона. Ён займае другое месца ў спісе бамбардзіраў Экстракласы і першае — па суме голаў і перадач сярод усіх гульцоў лігі.

Для Шкурына гэты хет-трык стаў першым з лістапада 2023 года і першым за час выступленняў за "Катавіцэ".