У Мінску затрымалі падазронага ў нападзе на ювелірную краму
Стоп-кадр з камеры назірання ў краме / @pressmvd
У МУС Беларусі адсправаздачыліся аб раскрыцці нападу на ювелірную краму ў Мінску, які адбыўся 21 жніўня на праспекце Незалежнасці, 155.
Па даных ведамства, злачынец у медыцынскай масцы, пагражаючы прадметам, падобным на пісталет, завалодаў ювелірнымі вырабамі і схаваўся з месца злачынства.
Пасля спрацавання “трывожнай кнопкі” інфармацыя аб здарэнні і апісанне падазронага былі перададзены патрульным нарадам, а супрацоўнікі службы відэаназірання ГУУС суправаджалі вышуковыя мерапрыемствы ў рэжыме рэальнага часу.
На працягу сутак асобу нападаўшага ўстанавілі — ім аказаўся 34-гадовы жыхар Мінска, які спрабаваў пакінуць краіну разам з выкрадзенымі ўпрыгожаннямі. Падазронага затрымалі супрацоўнікі крымінальнага вышуку пры падтрымцы байцоў спецпадраздзялення па барацьбе з тэрарызмам “Алмаз”.
Следчыя ўзбудзілі крымінальную справу па артыкуле аб рабаванні.
