Трамп здрадзіў Украіне, фронт пасыплецца? Украінскі ваенны эксперт пра тое, што далей

— Пасля таго як Дональд Трамп цярпеў поўнае фіяска са сваёй аперацыяй "Эпічная лютасць" у Армузскім праліве, якая і прывяла да цяперашняга паліўнага крызісу і дэфіцыту нафтапрадуктаў ва ўсім свеце, ён спрабуе неяк тэрмінова вырашыць гэтую сітуацыю. Адпаведна, ён дамаўляецца з нашым ворагам — Пуціным, — сцвярджае ваенны эксперт, аглядальнік групы "Інфармацыйнае супраціўленне" Аляксандр Каваленка.

Еўрарадыё расспытала яго, як рашэнні Трампа адаб'юцца на фронце, ролі Еўропы і настроях ва Украіне.

— Пачынаючы з 2023 года мы ўжо неаднаразова бачылі, як трампісцкае крыло Рэспубліканскай партыі пастаянна замінае Украіне і блакіруе дапамогу. Напрыклад, з 2023-га па 2024 год дапамогу блакіравалі на паўгода, што прывяло да нястачы снарадаў на фронце.

Зараз мы бачым ужо іншыя дзеянні Дональда Трампа, якія будуць шкодзіць Украіне. Гэта значыць, ён не той чалавек, якому мы можам давяраць. Гэта не той чалавек, на якога мы можам спадзявацца ў пытаннях падтрымкі Украіны.

Але Дональд Трамп, як заўсёды, робіць стаўку не на тых: ён дамаўляецца з Пуціным. І вельмі цікава паглядзець, як Пуцін будзе забяспечваць пастаўкі нафтапрадуктаў і дызельнага паліва, калі ў Расіі гараць нафтаперапрацоўчыя заводы. А яны і далей будуць гарэць. Украіна не спыніць гэтых удараў, — упэўнены Каваленка.

Эксперт лічыць, што такія заявы прэзідэнта ЗША — гэта заігрыванне з амерыканцамі перад прамежкавымі выбарамі 3 лістапада.

— Дональд Трамп паспрабаваў з дапамогай такіх заяў хаця б інфармацыйна супакоіць сваіх выбаршчыкаў, якія ўжо пакутуюць ад росту цэн на нафту і дызельнае паліва. Але ніякага выніку не будзе.

Украіна як наносіла, так і будзе наносіць удары па расійскіх НПЗ. А нафтапрадукты, якія і раней не перапрацоўваліся ў поўным аб'ёме, і далей не будуць вырабляцца ў дастатковай колькасці.

Такім чынам, мы ўспрымаем гэта выключна як чарговы перфоманс Дональда Трампа, які не акажа якога-небудзь глабальнага ўплыву ні на сітуацыю на полі бою, ні на становішча Расіі.

Расія, у сваю чаргу, прадэманстравала, як хутка яна можа атрымліваць звышпрыбыткі ад гандлю дзеля сітуатыўнай выгады. Яна спрабуе зарабіць на гандлі з ЗША — краінай, якая з'яўляецца галоўным ворагам Ірана, які пакутуе ад амерыканскіх удараў.

Таму сітуацыя не настолькі крытычная. Самае крытычнае для нас пытанне — гэта якраз ракеты для сістэм процівапаветранай абароны, — сцвярджае ваенны эксперт.

Якой будзе цяпер роля Еўропы ў сувязі з новымі паводзінамі Трампа? Каваленка нагадвае, што прама зараз — Еўрасаюз адзін з самых стабільных партнёраў Украіны. Але на гарызонце відаць хмары.

— У Еўропе адбываюцца не вельмі пазітыўныя палітычныя працэсы. У асноўным яны звязаны з тым, што да ўлады прыходзяць ультралевыя і ультраправыя сілы, якія, мякка кажучы, як і той жа Трамп, прытрымліваюцца прарасійскіх поглядаў.

"Альтэрнатыва для Германіі" умацоўвае свае пазіцыі. Марын Ле Пэн у Францыі таксама імкнецца прыйсці да ўлады. Гэта таксама ўяўляе для нас сур'ёзную праблему.

У Бельгіі не ўсё добра. У Вялікабрытаніі Фарадж працягвае нарошчваць электаральную падтрымку, што таксама не сулiць Украіне нічога добрага.

Пакуль пазіцыі Украіны ў Еўропе дастаткова добрыя і стабільныя. Але праз два-тры гады ўсё гэта можа змяніцца.

Таму ўжо зараз мы павінны думаць пра тое, як нарошчваць уласную самадастатковасць. Над гэтым мы і працуем, каб праз некалькі гадоў наш ваенна-прамысловы комплекс мог цалкам забяспечваць нашы патрэбы.

Такім чынам, з аднаго боку, пакуль усё складваецца дастаткова пазітыўна. Але ў сярэднетэрміновай і доўгатэрміновай перспектыве мы ўжо рыхтуемся да сур'ёзных выклікаў, якія могуць узнікнуць непасрэдна ў самой Еўропе.

Мы павінны знізіць залежнасць ад еўрапейскіх партнёраў, — упэўнены Каваленка.

Як украінскае грамадства аднеслася да перамен з боку Трампа? Наш суразмоўца лічыць, што Украіна чакала чагосьці падобнага.

— Як і чакалася, усё гэта цалкам прадказальна. Нічога новага. Мы добра разумеем агульную сітуацыю, якая склалася на сённяшні дзень у адносінах з ЗША.

Мы не здзівімся ні новым правакацыям, ні зрыву якіх-небудзь дамоўленасцей з боку Дональда Трампа. Гэта цалкам чаканы працэс, які зусім не дзівіць украінцаў.

Насупраць, нас бы здзівіла, калі б Дональд Трамп цалкам пачаў падтрымліваць Украіну і адкрыта выступіў супраць Пуціна. Але гэтага не адбудзецца, — падсумоўвае ваенны эксперт Аляксандр Каваленка.