На нямецкага пастаўшчыка дронаў Украіне рыхтаваўся замах — СМІ
Штэфан Туман / BILD
Людзі, звязаныя з расійскімі спецслужбамі рыхтавалі замах на нямецкага прадпрымальніка Штэфана Тумана, піша BILD. Ягоны стартап Donaustahl пастаўляе Украіне разведвальныя і ўдарныя дроны.
Разведкай дома Тумана ў Ніжняй Баварыі займаўся ў снежні 2025-га ўкраінец Сяргей Н. Баварскія следчыя арыштавалі яго пасля сігналу ад замежнай разведвальнай службы. Аднак з увагі на недахоп доказаў мужчыну неўзабаве адпусцілі. Толькі калі следчыя прааналізавалі звесткі ягонага тэлефона, яны зразумелі, што ўкраінец сачыў не толькі за Туманам, але і за ягоным бацькам, а таксама знайшлі ўказанні на ягоныя кантакты з расійскай спецслужбай. Але на той час Н. ужо даўно пакінуў Германію.
Затрымалі ўкраінца толькі ў сакавіку, але ўжо ў Іспаніі. Пазней удалося таксама адшукаць яго меркаваную саўдзельніцу з Румыніі. Ад таго часу Туман, як пішуць нямецкія СМІ, знаходзіцца пад узмоцненай аховай.
