Краўцоў: усе забылі пра Калеснікаву, а яна становіцца ледзь не асобай №1

16/08/2026 - 17:04

Марыя Калеснікава і Іван Краўцоў / LookByMedia

Былы прадстаўнік штаба Бабарыкі і экс-сакратар Каардынацыйнай рады Іван Краўцоў у падкасце Елізаветы Пракопчык "Бякі-Букі" паразважаў пра з'яўленне экс-прэтэндэнта ў прэзідэнты на канферэнцыі "Новая Беларусь" і дзейнасць Марыі Калеснікавай.

Прыход Віктара Бабарыкі на канферэнцыю Краўцоў лічыць "слабым ходам". Па словах былога прадстаўніка штаба, палітык не здолеў "вызначыцца, ты будуеш сваё ці ўдзельнічаеш у агульным руху". Пры гэтым, адзначыў экс-сакратар у КР, пасля канферэнцыі многія кінуліся абмяркоўваць Бабарыку, спрачацца з ім, нават аналізаваць, як ён сядзеў у зале.

"Але ўсе забылі пра Калеснікаву. Гэта значыць, яго [Бабарыку на канферэнцыі] там абасралі. Але калі паглядзець на тыя мерапрыемствы, у якіх удзельнічае кожны тыдзень Калеснікава, на ўзровень людзей, з якімі яна сустракаецца, то гэта наогул не параўнаць.

І вось пра гэта ў нас [у медыяполі] глуха, таму што гэта нецікава. Цікава паглядзець, як там канкуруюць, што там Латушка сказаў, Бабарыка. А тое, што Калеснікава ў прынцыпе зараз становіцца ледзь не тварам нумар адзін. Асобай нумар адзін з Беларусі для Германіі яна дакладна стала, а яшчэ іншых краін — скажам так, нетрадыцыйных, не ў Польшчы, не ў Літве, а крыху больш заходніх".

Пракопчык нагадала пра абмеркаванні аднаго з выступленняў Калеснікавай, у якім былая палітзняволеная заклікала да перамоваў з рэжымам.

"А які толк? — адказаў Краўцоў. — Гэта значыць, Калеснікава едзе на Мюнхенскую канферэнцыю, на GLOBSEC у Берлін, на тапавыя івэнты, сустракаецца з канцлерам, адкрывае канферэнцыю прамыслоўцаў Германіі, дзе знаходзяцца шматмільярдныя нямецкія холдынгі. І яна гаворыць пэўныя меседжы. Яна іх, паверце, гаворыць кожны тыдзень, гэтыя меседжы".

Але, дадае Краўцоў, гэта не гаворыцца аўдыторыі, якая глядзіць беларускі YouTube.

"Усё, што яна гаворыць, не слухайце гэта, гэта ўсё лухта", — трактуе Краўцоў абмеркаванні дзейнасці Калеснікавай у беларускім YouTube. — "А тое, што яе Мерц [канцлер ФРГ Фрыдрых Мерц] слухае або Урсула [прэзідэнтка Еўракамісіі Урсула фон дэр Ляен] стаіць і апладзіруе ёй на сцэне або што з Каяй Каллас (кіраўніца дыпламатыі ЕС) яны сустракаліся, пра што гаварылі — не звяртаюць увагі. Галоўнае, што мы самі засралі ў сябе на канферэнцыі "Новая Беларусь", якая праходзіць у гатэлі дзесьці ў канферэнц-зале. […] Робім выгляд, што няма [Калеснікавай]."