Буйныя прадпрыемствы працягваюць не плаціць за цеплавую і электраэнергію ў бюджэт

Буйныя беларускія прамысловыя прадпрыемствы, такія як МТЗ, ААТ “Палессе”, ААТ “Гродзенскі шклозавод” і іншыя, працягваюць затрымліваць аплату за пастаўленыя ім электра- і цеплаэнергію. Гэта вынікае з пратакола пасяджэння рэспубліканскай камісіі па кантролі за разлікамі за прыродны газ, электрычную і цеплавую энергію ў Беларусі. Дакумент у распараджэнне Еўрарадыё перадала ініцыятыва BELPOL.

Пасяджэнне камісіі прайшло пад старшынствам міністра энергетыкі Беларусі Дзяніса Мароза. Згодна з пратаколам, па выніках работы за чэрвень і ліпень 2026 года не выканалі рашэнні камісіі ад 25 чэрвеня 2026 года ААТ “Палессе”— па аплаце электраэнергіі за май і чэрвень, ААТ “Гродзенскі шклозавод” і яго філіял “Елізава” і ААТ “Мінскі трактарны завод” — па разліках за газ за чэрвень, ААТ “Магатэкс” — па аплаце газу за май і чэрвень, ААТ “ФанДОК” — па разліках за энергаспажыванне са студзеня па чэрвень. 

З парушэннем тэрмінаў выканалі абавязацельствы ААТ “Гродзенскі шклозавод” і яго філіял “Елізава”, ААТ “Магатэкс” і ААТ “Мінскі трактарны завод”.

Пры гэтым на 20 ліпеня 2026 года ўзровень аплаты за энергарэсурсы, спажытыя ў ліпені, склаў 43,4 працэнта за газ і 67,7 працэнта за электраэнергію і цяпло.

Камісія абавязала канцэрн “Беллегпрам” забяспечыць у тэрмін да 6–14 жніўня 2026 года поўную аплату энергарэсурсаў, спажытых ААТ “Світанак”, ААТ “Камволь”, ААТ “Палессе” і ААТ “Магатэкс”.

Мінбудархітэктуры даручана забяспечыць аплату газу для ААТ “Шклозавод “Нёман” і пералічэнне не менш за 7,89 мільёна рублёў за торфавае паліва для холдынга “Беларуская цэментная кампанія”.

Аналагічныя даручэнні атрымалі Мінпрам — у дачыненні да ААТ “БМЗ”, ААТ “Мінскі трактарны завод” і ААТ “Лідскі ліцейна-механічны завод”, канцэрн “Белнафтахім”— у дачыненні да ААТ “Белшына”, а таксама Белкаапсаюз — у дачыненні да Віцебскага абласнога спажывецкага таварыства.

У выпадку невыканання даручэнняў камісія прадугледзела абмежаванне падачы газу на 25 працэнтаў для ААТ “Палессе”, ААТ “Магатэкс” і ААТ “Беларускі цэментны завод”, на 50 працэнтаў — для ААТ “Світанак”, а таксама спыненне падачы газу на чатыры катлагазавыя ўстаноўкі ААТ “Камволь” і прыпыненне аднаўлення паставак на адключанае абсталяванне ААТ “Гродзенскі шклозавод”. 

Таксама прадугледжана абмежаванне падачы электраэнергіі на 25 працэнтаў для ААТ “Гродзенскі шклозавод” і яго філіял “Елізава” і ААТ “Лідскі ліцейна-механічны завод”, на 50 працэнтаў — для ААТ “Палессе”, ААТ “Камволь”, ААТ “Світанак”, ААТ “Магатэкс”, ААТ “ФанДОК”, ААТ “Гомельдрэў” і ААТ “Барысаўдрэў”.

Нагадаем, што Еўрарадыё раней пісала пра недаплаты прадпрыемстваў у бюджэт за спажываную энергію. Камісія збіраецца кожны месяц.