Грамадзянін Беларусі пацярпеў падчас дронавай атакі на Браншчыну
Дрон, ілюстрацыйнае фота / iStock/Olena Bartienieva
Падчас дронавай атакі ў Бранскай вобласці Расіі пацярпеў грамадзянін Беларусі. Пра гэта заяўляе дзяржаўнае інфармагенцтва БЕЛТА са спасылкай на МЗС нашай краіны.
Паведамляецца, што беспілотнік атакаваў легкавы аўтамабіль у Злынкаўскім раёне Браншчыны. Пры гэтым траўмы атрымалі тры чалавекі, адным з якіх быў наш суайчыннік.
Беларуса даставілі ў Злынкаўскую бальніцу, яму аказваюць неабходную медыцынскую дапамогу. Стан пацярпелага ацэньваецца як стабільны.
Гэта не першы выпадак, калі нашы суайчыннікі трапляюць пад атаку дронаў у Бранскай вобласці. МЗС Беларусі рэкамендавала ўстрымацца ад такіх паездак.
